ရတ်အပါ

လျးကျာ်သြဳ ကၞပ်(၅)

   ပ္ဍဲကွာန်ပစ္စန္တရးမွဲဒၞာဲ ဗမၞးသမ္ၚေဟ်မွဲ ပ္တဴအိန်ထံၚ်တုဲ ကလိဂွံလဝ်ကောန်ဇာတ်ပိတၠရ။ သမ္ၚေဟ်ဂှ် မၞုံကဵုဇဲလွဳ ပ္တိတ်ဇြဟတ်လ္ပာ်ကမၠောန်ဗွဲမလောန်ရ။ အခိၚ်ဂွံလၞုဟ်အာ လ္ပာ်ကမၠောန်ဟွံမွဲ၊ နူဂယးသဝ်တ္ၚဲ ပ္တိတ်မံၚ်ဇဲလွဳ သွက်ဗုၚ် ဂၞဴတံရ၊ ကမၠောန်ခိုဟ်ပရေံ ဟွံဟီုရေၚ်တၠုၚ်တဴရ။

  ကောန်သမ္ၚေဟ်ပိဂှ် ၜိုန်မၞုံကဵုရုပ်သာ်ကျေဝ်ဂေါဝ် တဴကီုလေဝ် စိုတ်ဟွံမွဲကဵုကမၠောန် လၟုဟ်ဒ္ကုဲ မံၚ်လၟိုန်ရ။ သမ္ၚေဟ်ဂှ် နူသမ္ဘာဇကုစဴအာဘဝပလိုက်တုဲ ကမၠောန်ဗ္ၚကီု၊ ကမၠောန်ကၠအ်သွဝ်ဥယျာဉ်ကီု

သီုကမၠောန်ပ္ဍဲသ္ၚိနာနာသာ် ဒးရေၚ်တၠုၚ်တဴရ။ ကောန်သမ္ၚေဟ်ဂှ် တီဆတက်ကျာ ဂ္ဇအ်ဆေၚ်ဍာ် လက်ဖက် ဗက်မိပ်ဂြိုၚ်စပၠေၚ်မံၚ်သၟးသၟးရ။

   ကာလမသကလောကောဒေံ ဗ္တိုက်ဖေအာဝ်ကဵု ကၠောန်ကမၠောန်မ္ဂး ̏အပါပိုဲ ကၠောန်ဗ္စမံၚ်ပိုဲရတှ်ေ မုပိုဲဂွံဒး ကၠောန်မံၚ်ဏီရော?" ဗီုဏံက္လေၚ်ဟီုသွဟ်ရ။

  သၞာံလေဝ်လအ်ကၠုၚ်သိုက်က် ကောန်သမ္ၚေဟ်ပိဂှ်လေဝ် စိုပ်ကၠုၚ်အဝဲဗၠာဲ သမ္ၚေဟ်ဂှ်လေဝ် အာယုက်ဇၞော် အဝဲဗျုကၠုၚ်သိုက်သိုက်ကီုရ။ ဗီုဍောတ်ဍောတ်တေံ ဂွံရေၚ်တၠုၚ်ကမၠောန်ကေၚ်ကာ ဟွံမာန်ကွေံကွေံတုဲ ဥယျာဉ်ကၠအ်သွဝ်တံဂှ်လေဝ် ဒှ်ညံၚ်ဂြိုပ်ဇၞော်ထုဲၜန်တဴရ။ ကောန်ဇာတ်တံဂှ်လေဝ် စိုတ်ဟွံလုပ်စကဵု ကမၠောန်ကေၚ်ကာရ။

ကာလဂှ်-

   ̏ယွံကောန်တံ မုဟိုတ်ဂွံဂ္ဇံပၠေၚ်မံၚ် အခိၚ်အိုတ် ဂှ်ရော အပါဏံ ဗီုဍောတ်ဍောတ်တေံဟွံသေၚ် ဇြဟတ် ဇိုၚ်တဲဟွံခိုၚ်ရ ကောန်တံကၠောန်စကမၠောန်ကီု" အပါဂှ်ဟီုတုဲ ကောန်တံဂှ် ̏ယွံအပါသွက်ဂွံ ကၠောန်ကမၠောန်ဂှ် အခိၚ်ဟွံလဇုဲဏီပုဟ် မံၚ်ဒၟံၚ်ၜိုဟ်ဟ် သြိုဟ်ဟ်ကၠာ" သာ်ဝွံ က္လေၚ်ဟီုတဴကဵုအပါဂှ်ရ။

သမ္ၚေဟ်ဂှ် ဒၟာနူကောန်တုဲ စိုတ်ဟွံဒှ်တသိုက် ဗွဲလောန်ရ။ ပရေၚ်ထတ်ယုတ်လေဝ် မွဲတ္ၚဲကဵုမွဲတ္ၚဲ ဆောတ်ယောၚ်ကၠုၚ်တုဲ၊ လက္ကရဴအိုတ်ဏံလောတ်စှ်ေ အာဒၞာဲသတိက်တုဲ က္လေၚ်က္တဵုဟွံမာန်ရ။

    ကာလဂှ် ကော်ပကောံဂွံကောန်ဇာတ်တံဂှ်တုဲ ဟီုဗ္ကန်တဴရ။

̏ယွံကောန်တံ အပါဏံစိုပ်မံၚ်အခိၚ်လအိတ်ရ၊ အပါဟွံမွဲတုဲ ကောန်တံဗီုလဵုဂွံမံၚ်စံၚ် ဂွံစသုၚ်အာရော ကောန်တံမုကမၠောန်ရောဟွံကၠောန် မုကမၠောန်ရော ကၠောန်ဟွံလေပ်" သာ်ဝွံဗျိဒေါန်တုဲ သီုအောန် တဴစိုတ် ဟီုကရောတ်တဴ ဍာ်ရမတ်တံဇွောဝ်စှ်ေပြုဲပြုဲရ။ 

   ကၠာအပါမတ်ဟွံပၠိုတ်ဏီ သွက်ကောန်တံ အပါဏံပၞုက်စွံလဝ်နွံမွဲရ။ အတိုၚ်ကောန်တံဆဵုမံၚ်ဂှ်ရ အပါဏံမၞိဟ်ပ္တိတ်ဇြဟတ်ကဵုကမၠောန်မွဲတုဲ သၞာံဗွဲမလအ် အပါဏံပ္ကောံစွံလဝ် ထဝ်နွံမွဲနုၚ်ရ။ နုၚ်ထဝ်ဂှ် တိုပ်လဝ်ဇရေၚ်သ္ၚိဏံရ၊ ဒၞာဲဍာံစၟတ်ဂှ် အပါဏံသမ္တီဟွံဒးရ။ နုၚ်ထဝ်အပါ စွံပ္တန်လဝ်ဂှ် ကောန်တံဂၠာဲ ညံၚ်ဂွံဆဵုညိ။ ထဝ်တံဂှ် ဒှ်သွက်ကောန်တံ ဂွံဂျိုၚ်လမျီုဗွဲတသိုက်ရ၊ သာ်ဝွံဟီုဗ္ကန်လဝ် ကဵုကောန်တံဂှ်ရ။ သမ္ၚေဟ်ဂှ် ခြာဟွံလအ်ဟေၚ် ဒးအာစိုပ်အနိစ္စဓဝ် စဴအာဘဝပလိုတ်တေံရ။

  ကောဒေံတံညးပိဂှ် အတိုၚ်အပါအံက်ဇကုဗ္ကန်လဝ်ဂှ် ၜံက်ခဲါဂၠာဲတဴနုၚ်ထဝ်ဂှ်ရ။ နူဂယးသဝ်တ္ၚဲ ပ္တိတ်ဇဲတုဲ ၜိုန်ဂၠာဲသ္ၚဳတဴကီုလေဝ် ဟွံဆဵုကေတ်ရ။

  ကောဒေံညးပိဂှ် ဍောၚ်လေဝ်ဍောၚ် နုၚ်ထဝ်လေဝ်ဟွံဆဵုတုဲ ညးလ္ဒောဝ်ဂှ်ဟီုတဴရ၊ ̏ယွံကောဇၞော် ပိုဲၜံက်ဂၠာဲမံၚ်ဇိုၚ်သ္ၚိဏံသၟးမ္ဂး ဆဵုကေတ်ဟွံမာန်ရ၊ ပွိုၚ်ကၠအ်ပိုဲမွဲအလုံအိုဿီု ပိုဲၜံက်ဂၠာဲအာမ္ဂး ခိုဟ်တဴရ"သာ်ဝွံ ညးလ္ဒေါဝ်ဂှ်ကဵုကသပ်တုဲ ညးပိဂှ်အလုံကၠအ်မွဲ ၜံက်ခဲါဂၠာဲတဴကီုလေဝ် ဟွံဆဵုကေတ် နုၚ်ထဝ်ဂှ်ရ။ ကာလဂှ် ညးဍောတ်အိုတ်ဂှ် ဟီုတိုန်ပၠန်ရ။

   ̏ယွံကောတံ စိုတ်ဓာတ်လ္ပလီု နုၚ်ထဝ်အပါဗၠိုက်မံၚ်သၟဝ်ဏံရ၊ ထပ်ဂၠာဲစှ်ေညိပၠန်မ္ဂး ဂွံဆဵုကေတ် မာန်ရ၊ ကဵုဇြဟတ်ဗ္တိုက်ဗ္တောန်မံၚ်ညးသ္ကံရ။

   ကောဒေံညးပိဂှ် ဟိုတ်နူလောဘဇဴစကာလဝ်တုဲ ဍောၚ်ဟွံလေပ်ဇူဟွံမွဲ၊ ဟိုတ်နူအသိၚ်လောဘဇဴ ဓလီုလဝ်တုဲ ပဠက်နူက္ဍိုပ်စိုပ်ဇိုၚ် ဇွောဝ်ဍေၚ်တဴလေဝ် ဟွံလုပ်ဇူ၊ ကာလဂှ် ညးဇၞော်ဂှ်ၜံက်ဒး ဝတ္ထုမကြံၚ်မ္ၚိုဟ်မွဲ ဗြုတိုန် ̏ဍက်" ထေၚ်ဂးနုၚ်ထဝ်တုဲမိပ်မြဟ်တိုန် သီုဟွံကျောဝ် ရံၚ်ချိုတ်ပၠိုတ် က္ညာၚ်ကော်ဒေံၜါဂှ်ရ။ ဒေံၜါဂှ်လေဝ် ထေၚ်ဂးနုၚ်ထဝ်တုဲ ဂြိုပ်ကၠုၚ်ဇရေၚ်ကောဂှ်ရ၊ ညးပိထိုက် ကယျာတိုန် နုၚ်ထဝ် လေဝ်ဟွံသေၚ် ဒှ်ဒၟံၚ်တၟံက္လောံတုဲ စိုတ်အေဲဇြၚုၚ်ၚတဴရ။

  ညးပိဂှ် ဆက်ရပ်ဂွံၜံၚ်တူတုဲ ခဲါဂၠာဲတဴပၠန်ရ။ ၜံက်ဂၠာဲမံၚ် တိလ္တူဒှ်တိသၟဝ် ဂၠိုက်ဂၠာဲမံၚ်အလုံ ကၠအ်ဥယျာဉ် မွဲလေဝ်ဟွံဆဵုကေတ်တုဲ ̏ယွံဒေံတံ ပိုဲဂၠာဲမံၚ်အလုံကၠအ် ဥယျာဉ်မွဲအိုတ်အာယျ မူလေဝ်ဟွံဆဵုဂုဏ်ဖဵု ဍေံဂွံနွံဂးပိုဲ တဵုလွဳနဲအပါပိုဲ မပ္တံသၞေဝ်ကေဝ်စၞစ စၞသုၚ်သတ်ဆု သတ်ဒုန် မပ္တံသြောံဂန်၊ၜဴ၊ကြုက်တံနာနာသာ်မ္ဂးတှ်ေ ခိုဟ်ရ̋ ကောဇၞော်ဂှ်ဟီုတုဲ ဒေံၜါဂှ်လေဝ်တုပ်စိုတ် တဵုလွဳတဴသၞေဝ်ကေဝ် သတ်ဆုသတ်ဒုန်နာနာသာ် အလုံကၠအ်မွဲရ။ သၞေဝ်ကေဝ် သတ်ဆု သတ်ဒုန် သတ်ကဴကၠုၚ်တုဲ၊ သွံရာန်ဒှ် အာတၠကၠအ်သွဝ် သၞေဝ်ကေဝ်သတ်ဆုသတ်ဒုန်တုဲဒှ် ကၠုၚ်ပိုန်ဒြပ် ထဝ်သြန်ရ။

   ကာလဂှ်ကောဇၞော်ချပ်ဂွံ အရေဝ်အပါဇကု ဗ္ကန် လဝ်တိုပ်စွံလဝ်နုၚ်ထဝ်ဂှ်တုဲ ဟီုကဵုဒေံၜါဂှ်ရ။

  ̏ယွံဒေံတံ အပါပိုဲဗ္ကန်လဝ်တိုပ်လဝ်နုၚ်ထဝ်ဟီုဂှ် တၞဟ်သအာၚ်ဟွံသေၚ်ရ သတ်ဆုသတ်ဒုန် ပိုဲတဵုလွဳလဝ်ဏံဂှ် ဒှ်နုၚ်ထဝ်အပါကဵုလဝ်ရဒေံတံ၊ ရတ်အပါပိုဲ ကဵုလဝ်ဏံ မွဲ ဘဝပိုဲစသုၚ်ဟွံအိုတ်ရ"

   ကောဒေံညးပိ ကၠိုဟ်ကေတ်စေတနာအပါတုဲ မိပ်မြဟ်အဵုဇိုတ် ပ္တိတ်အာဇြဟတ် လ္ပာ်ကမၠောန် ဂယိုၚ်အာလမျီု နကဵုကမၠောန် တဵုလွဳကၠအ်သွဝ်တံဂှ်ရ။

ကွးဘာမန်-မိပ္ကဴသြန်